Премьер-Министр кандидатурасы таяу күндері Мемлекет басшысына ұсынылады. Бұл туралы Мәжіліс төрағасы Ерлан Қошанов айтты.
«Таяу күндері ұсынылады. Уақыты келгенде білесіздер. Қазір мен оны ашып айта алмаймын. Мемлекет басшысына кандидатураны (Премьер-Министр кандидатурасы) таяу күндері ұсынатын боламыз. Мүмкін ертең не арғы күні. Қазір процедурасын пысықтап жатырмыз. Президентпен кездесуде ұсынатын шығармыз және жалпы отырыста келісімімізді береміз», — деді Мәжіліс төрағасы БАҚ өкілдерінің сауалына орай.
Ерлан Қошанов дәл қазір Үкімет басшысына мына кандидатты ұсынамын деп айту орынсыз болатындығын баса атап өтті.
«Партия төрағасы ретінде ол — үлкен жауапкершілік. Партия фракциясында ақылдасуымыз керек. Содан кейін мен сіздердің алдыларыңызға шығып не болмаса тиісті процедуралар арқылы сауалдарыңызға жауап беремін», — деді Мәжіліс төрағасы.